Helene Dalager Junge

Kinaana Helene Dalager Junge

Angutip sulilluarluni angusarissaartup tunuatungaaniittuaannarpoq arnaq nukittooq, Svend Jungemullu tapersersuilluartuartoq, tassaavoq Helene Dalager Junge.

Helene Svendilu naapeqqaaramik qiviarnermi siullermi asanninneq misigaat.

Helenep angutaa, Frederik Dalager Nuumminngaanneersuuvoq Kalaallillu Nunaanni piffinni assigiinngitsuni ajoqitut sulinikuuvoq. Frederiup nulia, Marie Dalagerip Helene Aamarutissani novembarimi 1933-imi panissaaraa, tassumalu kingorna ilaqutariinnguit Nuummut uterput.

Helene Svendilu maajip 22-ani 1965-imi Svendip inuuiani Kæmnerip Allaffiani katipput, ullorlu taanna paniat angajulleq aamma kuisippoq.

Maajip 22-at Helenemut Svendimullu ulluuvoq immikkuullarissoq. Pisissagaangamik tunisissagaangamilluunniit ulloq taanna pisoqarfiusarpoq. Helene Svendilu piffissami pineqartumi suleqatigiilluartaqaat. Helene aamma Svend 13-inik meeraqarput, amerlasuunillu asanartunik erngutaqarlutik.